Өнгөрөгч 10-р сарын 15-нд АНУ-ын Калифорни мужийн Лос Анжелес хотод болсон мэргэжлийн боксын тэмцээний гол тулаанд уулзаж нударга зөрүүлсэн WBC, The Ring холбоодын хагас хүнд жингийн аварга 46 настай боксчин Бернард Хопкинс, мөн жингийн WBC, IBF холбоодын аварга асан 29 настай боксчин Чэд Доусон нарын уулзалтын дүнг хүчингүй болгож, уг тулааныг болоогүйд тооцлоо гэж BoxingScene.com мэдээллээ.
Дашрамд сануулахад, тулааны 2-р үед Хопкинс өрсөлдөгчийнхөө нуруун дээр нь хамаг биеэрээ дарах үед цаадах нь огцом түлхсэнээр Хопкинс эвгүй унаж мөрөө гэмтээсэн юм. Гэмтлийн улмаас Хопкинс тулааныг үргэлжлүүлэх боломжгүй болсон тул Чэд Доусонг техникийн нокаутаар ялалт байгуулсанд тооцсон юм. Бернард Хопкинс энэ шийдвэрийг эсэргүүцэж, WBC, The Ring холбоод дэмжсэнээр, Калифорни мужийн Спорт хороо энэ маргааныг өчигдөр авч хэлэлцсэн бөгөөд санал хураалтын 4:1 гэсэн харьцаагаар Чэд Доусонд өгсөн ялалтыг цуцалж, тулааныг No Contest буюу болоогүйд тооцжээ. Тухайн үедээ WBC, The Ring холбоодын удирдлага 12-р сарын 13-нд Спорт хороо асуудлыг шийдвэрлэх хүртэл Аваргын бүсийг Доусонд гардуулж өгөхөөс татгалзаад байсан юм, харин ийн албан ёсны шийдвэр гарснаар Бернард тус холбоодын хууль ёсны дэлхийн аварга хэвээр үлдлээ.
Жич: Дүрэм ёсоор бол тулаан 4-р үеэс хэтрээгүй байхад өрсөлдөгч тамирчдын нэг нь гэмтэж цааш үргэлжлүүлэх боломжгүй болбол ялалтыг аль нэг талд өгөх ёсгүй бөгөөд тухайн уулзалтыг "болоогүй" хэмээн үзэж тулааныг хойшлуулдаг юм.
зөв шийджээ
ReplyDelete