Дана Уайт: Tулаанчид тэнцсэн бол нэмэлт нэг үе тулалдана

UFC холбооны ерөнхийлөгч Дана Уайтаас саяхан mmafighting.com, зарим тулааны тухайд шүүгчид "тэнцсэн" гэсэн шийдвэр гаргадаг талаар ямар бодолтой явдгийг нь асуухад: "Би тэнцсэн шийдвэр гарахад үнэн голоосоо дургүй, энэ бол өчнөөн цаг хугацаа, хөрөнгө хүч дэмий үрж байгаатай л адил. Энэ байдлыг өөрчлөх хэрэгтэй. Тамирчид үндсэн цагтаа тулалдаад тэнцэж байгаа бол гурван минутын нэмэлт нэг үе тулалдуулж ялагчийг тодруулах нь зөв" гэжээ.

                                  Дана Уайт

Тэнцээгээр өндөрлөсөн хамгийн сүүлийн үеийн тулаанаас л гэхэд, UFC 125 тэмцээнд болсон Фрэнки Эдгар, Грэй Мэйнард, UFC 127 тэмцээнд болсон Би Жэй Пенн, Жон Фитч нарын тулааныг дурьдаж болох юм.

UFC-ээс зохиож байгаа чансаа ахиулах тулаан нь үе бүрийн хооронд нэг минутын завсарлагатай, үе тус бүр нь таван минут үргэлжлэх гурван үе, харин аваргын цолны төлөөх тулаан нь үе тус бүр нь таван минут үргэлжлэх таван үеэс бүрддэг бөгөөд, одоогоор дүрэмд, тамирчид тэнцсэн тохиолдолд нэмэлт үе тулалдуулах заалт тусгагдаагүй байгаа юм.