Мэргэжлийн боксын гурван өөр жинд дэлхийн аварга болж байсан Америк улсын тамирчин Шэйн Мосли зодог тайлж буйгаа албан ёсоор зарлалаа. Тэрээр Twitter-т: "Бүгдэд нь өглөөний мэнд хүргэе! Намайг хайрлаж, дэмжиж ирсэн та бүхэндээ баярлалаа. Би сайхан карьер туулж өнгөрүүллээ. Ялсан ч, ялагдсан ч, тэнцсэн ч бай ― карьерынхаа бүх мөчид нь би хайртай" гэж бичжээ.
Шэйн Мосли нь 19 жил үргэлжилсэн карьертаа мэргэжлийн боксын IBF холбооны хөнгөн (61,2 кг), WBC, WBA холбоодын хагас дунд (66,6 кг), WBC, WBA холбоодын 1-р дунд (69,8 кг) жингийн аваргын цол хүртсэн юм. Тэрээр рингэнд 56 тулалдаж, 46 ялж (үүнээс 39-ийг нь нокаутаар), 8 ялагдаж, 1 тэнцсэн, 1 тулаан нь болоогүйд тооцогдсон хувийн амжилттайгаар 40 насандаа ийнхүү их спортыг орхилоо.
No comments:
Post a Comment